我地都好容易先入為主，例如認定護士一定係女性；馬拉松冠軍一定係黑人 ，亦無諗過氣泡酒可以係紅色。無錯，呢個世界真係有氣泡紅酒，香港雖較少人認識，但如果你曾到訪澳洲，就會發現Sparkling Shiraz其實相當盛行。

釀造香檳既三大葡萄品種Chardonnay、Pinot Noir及Pinot Meunier，其實當中兩款都係紅葡萄，只不過無經浸皮，所以釀成既氣酒色澤同白酒一般。原來早喺十九世紀末，澳洲Victoria省既Seppelt酒莊，已率先採用Shiraz紅葡萄釀造出澳洲最獨特既Shiraz氣泡紅酒，從此成為左澳洲最具代表性既酒款之一。第一次飲氣泡紅酒，難免有種奇怪既感覺，但一飲就容易愛上。佢比一般氣泡酒濃郁，味道微甜帶黑布冧、黑加倫子等成熟漿果香，最特別當然係單寧同氣泡既組合，奇妙之處只能意會，非言語能形容。

不過要數紅氣泡酒先驅，意大利既Lambrusco先係鼻祖，甚至可追溯至古羅馬時期已有釀製。Lambrusco係一款用Lambrusco葡萄釀制既紅色氣泡酒。該品種於原產Emilia-Romagna大區，果實皮厚，單寧低，其變種及相關嫁接品種多達60種，遍布整個意大利。

Lambrusco味道怎樣形容呢？典型既味道係車厘子、黑莓、李子香氣，氣泡細密，感覺清爽，酒體不重，從乾身到甜既都有。意大利人鐘意用Lambrusco配芝士同Parma ham，配港式燒味如燒肉、燒鵝效果極好。

Sparkling Shiraz同Lambrusco喺澳洲同歐美都相當受歡迎，香港雖然不常見，幸好不乏優質酒莊，譬如不跟隨潮流、以百年老藤Shiraz釀造既Turkey Flat Vineyards 既Sparkling Shiraz；以及意大利權威評鑑Gambero Rosso常客，業內龍頭酒莊Cleto Chiarli出品既Lambrusco，都係信心之選。