Sparkling Sake主要可以分為三大類別！

直接加入二氧化碳

顧名思義就係直接加啲二氧化碳落啲Sake入面，係最方便同慳成本嘅做法。

好處係可以製造到好豐富嘅氣泡，但係同時啲氣都好快散晒。

另外因為直接加入二氧化碳入個樽到，所以並唔符合特別名稱酒嘅規定，就只能叫普通酒。

活性濁酒

無經過任何高溫殺菌，保留少量酒粕喺支清酒入面，利用佢殘餘嘅酵母同糖份繼續發酵而產生二氧化碳。

酒液睇落會濁濁地，同埋開瓶嘅時候要好小心佢爆出黎。飲落碳酸感好足。

有啲酒造擔心自己嘅產品會比人當做整蠱嘅作用，甚至會拒絕送貨比訂購者同收貨者不一嘅訂單。

二次發酵

二次發酵同法國香檳嘅製法好相似，但係清酒唔會另外加糖落去發酵，而係加入有發酵能力嘅酒粕入去，令佢進行二次發酵。

發酵完成之後會倒轉支酒，令啲酒粕沈積喺木塞嘅位置，冷凍凝固後取出。

另一個方法就係直接喺發酵缸入面進行二次發酵然後裝瓶。

兩個方法都可以令酒體清澈透明，氣泡亦會比較細緻持久。

另外都有個機構係專為有氣清酒而設

AWA Sake

係一間2016年11月創辦嘅協會，一開始係為左2020年嘅奧運而創立，希望可以取代到法國香檳成為慶祝用嘅氣酒。另外會組織業界提高產品嘅品質、會員品牌嘅知名度同埋開拓清酒嘅新市場。

AWA Sake嘅標準係：

• 只可以使用米、麴米，同埋水黎釀造
• 一定要使用三等米或以上
• 必須要使用二次發酵，不論瓶內定係發酵缸內
• 倒出時必須清澈透明，而且要有氣泡
• 酒精濃度10%或以上
• 氣壓必須係20度嘅情況達至某個標準 (3.5BAR)